【黄梅天(沪语小品文)】小品文
离开学堂里哀种让人瞌充格气氛,人格心情也马上会得好交关。
立夏刚过,马路两边格法国梧桐已经绿意盎然。
虽然是黄梅天气,空气湿嗒嗒格,但是也可以算一个勿错格日脚。
我笑嘻嘻格讲:“阿拉到哪里去好呢?”伊讲:“我也勿晓得,阿拉就随便荡荡马路好了。
” 大概是交关辰光没出来白相了,伊开心得像只小鸟,连走路也要跳法跳法了。
伊格手小小巧巧,讲勿出格适意,拿我格心也漾掉了。
阿拉转过街角,伊眼睛尖尖一记头就发觉了对过格冷饮店,就拉牢我跑过去,自说自话格从雪柜里拿出仔两根脆皮雪糕往我手里一塞,然后鸦到我格背后,吃吃格坏笑:“是侬买格。
” “痴头怪脑。
我付了钞票,拿伊捉回来,伊于是抿牢嘴巴,装了老乖老乖格样子。
我望了伊一歇,终于自家熬勿牢先笑出来,只好塞拨伊一根雪糕,伊笑得来立也立勿直。
我讲:“侬介惹气,将来没人要侬了。
” 伊马上跑过来拉牢仔我:“勿搭界格,我跟牢侬好来。
” 天一点点开始闷起来,阿拉荡仔几条马路,就孵进商场格空调间勿出去了。
我跟牢仔伊从U2跑到chanel,从Elle转到Christian Dior,心里吓唠唠,不过还好伊也就看中仔一只大路格皮夹子。
本来我最欢喜浓格黑咖啡,但是伊只欢喜加仔交关牛奶格cappuccino,所以我也就陪伊吃cappu了。
伊用调羹调了一调,就来煞勿及格啜了一口,结果急吼吼格,弄得嘴唇上都是咖啡,样子邪气可爱。
我望牢仔伊,心底一面好笑,一面又讲勿出格欢喜。
也勿晓得过了多少辰光,伊突然跟我讲:“快点看,外头要落雨了。
” 我往窗子外头瞄了一眼,果然,天高头格乌云已经低得勿好再低,天色昏昏沉沉,感觉到空气格闷湿也到了极点。
我笑了:“落雨喽,打烊喽。
” 伊也笑了:“小八腊子开会喽。
” 伊突然又兴奋起来,拉牢仔我格手讲:“阿拉出去淋淋雨好伐?”我呆了一呆,失笑格讲:“侬花样经哪能介透格啦?”伊嘴巴嘟嘟,硬劲要出去,我拗勿过伊,只好应承下来。
伊开心格笑了一歇,后头想起来啥,一本正经格问:“我是勿是老作格啊?” 外头真格落雨了。
后头是一多多雨水,最后就淅沥淅沥落起来了。
伊伸出手,摊开仔手掌,让手心被一点点打湿。
雨慢慢较大起来,打仔勒树叶子上噼哩啪啦格响,落仔勒商店格橱窗上划出一条条水迹,马路上开始有斑斑点点,越来越多,最后湿透了,就统统变仔了深颜色。
” 我笑了笑,没讲闲话。
雨越来越大,马路上格人都撑起了伞,要末就鸦进路边格商店里去了。
只有阿拉两家头手搀牢手,勒雨里慢慢较散步。
雨中格城市看出去有另外一种味道,颜色好像比老早新鲜一点,本来灰蒙蒙格房子,暗擦擦格广告,勒落雨格辰光好像也有了一种活力。
法国梧桐格叶子,看起来更加是水汪汪格绿,让人觉着生命充满希望。
伊停下来,拿辫子解开来,再拿湿头发撸到了耳朵后头。
我看牢伊笑,伊也对我笑笑,伊格眼神突然也像水一样格温柔,我勿会看勿懂伊眼睛里格意思。
“侬晓得伐,侬是对我最重要格人。
”我讲。
伊点点头:“嗯,侬也一样是格。
” 我跑到对过格花店里买了一束玫瑰花送伊,伊格面孔也通通红,像煞了玫瑰一样。
虽然人家讲,随便啥事体勒心里也藏勿牢多少辰光,总归要忘记得清清爽爽格,但是我想勿管哪能,只要我还记得伊,我就应该记得迪个落雨天,记得阿拉一道走过来格样子。
所以一到落雨格辰光,我还是欢喜去咖啡店,泡一杯咖啡看看外头格风景。
虽然我格对过已经勿会再有伊,也勿会再有人跟我搀牢手,开开心心格去做两只落汤鸡。